اهلا اعزائي هاي مذكرات نمله لكيته حشاكم بالمجاري
3/8/2010
اليوم شفت قطعة شكر بس القطعه كلش جبيره كلت اروح الابن عمي اجيب كونيه وجانت واكعه بالزويه بمنطقة القنفات الحمر زقاق الطبله
ام النفاضه وحاولت اطلعه ما كدرت فعفته ومن سمع المدير بالقصه مالتي خصم مني اسبوع وكلي رجعي اخذيه ومن رجعت لكيت دود فارسي جبير هناك....هلو زوج اليبقه درت وجهي ورجعت
4/8/2010
انعزمت بخطوبه مالت بت عمتي ابلوعت المطبخ خوش كعده والله وتمن وشكر وكشمش والقوزي جان صرصر بس مو هلكد طيب وجانو جايبين بكايه ركصت ركص بحيث عيني طلعت من راسي واني هم ذبيت لحم وما صارت حوادث بس اكو بنيه فتحت المي مال البوري وردنه ننشفط بس الحمدلله عبرت.....وهاي شغله ثانيه ابن عمي طوخ بالشرب وكام ايمسلت بحيث كام ايذب حجي ماصخ للصرصر عاد احنه حجينه ويه الصرصر كلناله دخيلك عوفه تره هذه سكران عاد هو طلع شريف وتفهم الموقف وعافه
5/8/2010
ما كدرت اروح للدائره(ها نسيت اكللكم هي تشتغل موظفه بشركة بلوعتكم دوت نيت وراتبه ورقه ام ال50)لان البوري مانكط وماكدرت ارتب شعري وظليت كاعده بالبلوعه
6/8/2010
ما صار شي مهم
7/8/2010
سمعنه ابلوعة جيرانه صياح وعياط والمختار مال المجاري اجه وكلنه لازم اكو شي وفعلا توقعنه لان ابو البيت مشتري شحاطه جديده وبين مفعلوها خطيه بيت جوارينه بعده شابه عمره 17 سنه جانت دتمشي البارحه دتسوك من المغسله وانعلست بالشحاطه وديناهه للطب العدلي ودفناهه بالحديقه الوره يم القنينه حته نعرف مكانه
8/8/2010
اليوم جان اكو منع تجول بالحمام بس النمل الوطني منتشرين بره لان اصحاب البيت كلهم طبو ايسبحون بصراحه خفنه نطلع خاف ننسحك بحذاء نعال ابو الاصبع(خطيه ابن خالة بابا راح بهيج حادث)وظلينا بالبلاليع نتفرج ع الدش(برنامج خليك بالبلوعه وبرنامج الخيال العلمي اصطياد الانسان امووووووت علي)وماسمعنا حوادث بس مره وحده سمعنه جريدي طب للحمام بس طلعت اشاعه لان جدي ايكول لو طاب جان سمعنه عياط بت ابو البيت
9/8/2010
حسيت بنفسي لعبانه ورحت للطبيبه كلتلي مبروك راح تبيضين هم رجعت فرحانه وشغلت اغاني وبديت بالرجيم بحيث كلمن ايشوفني ايكلي ضعفانه حيل
10/8/2010
اليوم صارو عندي 3بيضات بس كلش صغار يمكن راح اخلينهن بصف المكناسه ما ادري
11/8/2010
اليوم ردت اروح فطيسه جنت دا اتمشه يم البانيو طلع ابو البيت اثاري ديغسل اتفاجات اشو عله ساعه لكيت نفسي كدام مغاره ظلمه حيل واكو حبال طالعه من المغاره بصراحه الفضول كتلني كلت افوت فتت اشو ضربني هوه حار اتجبت جان اسمع صوت انفجا ر طرشه الاذني اتشوووووووووووووووو طلعت اني الثوله داخله بخشم ابو البيت واتصور جانت الفتحه اليمنه مو اليسره لان اليسره لكيت مكتوب عليه اعمال تبليط وحفريات الظاهر جان منشول وبس تك يشتغل بس هوه ما قصر عطس عطسه شمرني وره الفريزر 44متره عن البلوعه بحيث 3ايام يله رحعت البيتنه
12/8/2010
اليوم الذكرى ال12لضحايا دبة النفط اكيد تذكروه وكفنا كلنه دقيقه حزانين واذكرت لمن ام البيت جابت دبة النفط وذبته على اخوتي الصغار وكتلت47 نفر من عدنه بس اني همزين لحكت وشتريت كمامه ضد الكيمياوي وجدو دائما ايكول النمله لازم تخاف من شغلتين منتجات باته مال الجلود والدبه مال النفط ام ال5لترات لان معناهه كارثه وجثث
13/8/2010
اليوم انفجعنه بوفاة نمله من هاي الكبار مو مثلنه الصغار خطيه على كد حاله عده محل صغير اسواق تبيع بي تمن وشكر وعدس والصبح جان ديتمشه ايدور على اخو عباله لازك بالصابونه وجان ينلطش لطشه من هاي الزينه حته جثته ما لكيناه ومرته خطيه تبجي وتلطم واني هم كمت ابجي مو علي ايطبه 60مرض بس بعد منين اشتري تمن وشكر والجماله الزوالي شالوهن يعني لازم اتعنه للمطبخ صدك حيره
14/8/2010
اليوم عطله رحنه للمسبح كوب بي مي وبعدين وكفنه سره على قطعه مال دهن واكعه وهمزين حصلت قطعه وقليت بيه بيض
15/8/2010
دا افكر اترك البلوعه واروح البيت اختي بالريف لان عدهم بيت ترابي بالحديقه بصراحه جو المدن خنكني كلت شويه اروح اشتم هوه نقي بس المشكله شراح ايوصلني يرادلي 3اشهر ياالله اوصل للحديقه بس حليت المشكله جلبت بالبوتيت ابو الضوه مال ابنهم وطلعت ويا ووصلت بصرحه حذائه فيكه من يمشي ايطله ضوه دا افكر اسحب من الضوه واير ع الاقل ايشغلي بنكه وغساله
16/8/2010
اليوم شفت صوره للمحيط الهادي(البانيو)حيل شكد بي ماي هاي الصوره هيج خوفتني لعد اذا صدك شلون
13/8/2010
مم ماكو شي بس ام البيت كصت شعره واكو شعر انذب يمنه بالكاع سمينه هاي المنطقه غابة الاماني
14/8/2010
دا افكر اروح البيت خالي بالمطبخ لان خالي عايش بصف ناطحة السحاب(قنينة الغاز)فد شي كللللللللش عالي وكلي اكو مكان يم المنظم ولو غالي بس راح ياخذه اروح يمه اغير جو
15/8/2010
صار عندي تيفو من وره لحم مال معلبات بالسوك فقررت بعد ما اجيب معلبات
19/8/2010
التيفو راح وهسه اني زينه ويمكن راح اتعشه عشه خفيف
20/8/2010
اليوم ماكو شي بس ابن عمي اجر البلوعه الشركه والعقد وقعو والعموله ايجار مال شهر وكمع مال صمون
ملاحظه.
صاحبت هاي المذكرات المكروده توفيت بعد اسبوع من نشر مذكراته بسبب طوبة جبن وكعت عليه وسوته هريس
انشرو هاي المذكرات احياء لذكراها......